Ae Saaki

Fir voh dilkashi ka jaam pila
Ae saaki
Khud mujh ko mujhi se bhula
Ae saaki
Mere jism ko shama-e-pyaar mein
jal jaane de
Meri ruh ko fir marham to laga
Ae saaki

Chalisva Saal

Wrote this for my friend Gaurav Suri, his lovely wife Monika, son Anubhav and daughter Arunima on Gaurav’s 40th birthday.

Mubarak ho tujhko ye chalisva saal
Ye chehre ki jhurriyaan, ye girte huai baal

Haseenon ke sapnon mein kat ti thi raaten
Ab career aur investment ki karte tum baaten

Daru ki botal se tha rishta purana
Pite aaj bhi ho, par ab hai wine ka jamaana

Party mein naachte the saari saari raat
Ab excuse maar dete ho, yaar hai bachchon ka saath

Par kuch bhi kaho, ye chalis ki hai aalag baat
Ye sandhya ki vela hai, aadha din aadhi raat

To phir se kehta hoon

Mubaarak ho tujhko ye chalisva saal
Ek naye yug ki Arunima
Tera badhta hua Anubhav
Aur woh jo harpal tere jeevan ki taal

Dil karta hai is dha…

Dil karta hai is dharti par
Itna sundar chitr banaun
Gaata jaaun geet sunaun
Mein udta panchi ban jaaun

Socha karta dekh kali ko
Mein chanchal bhavra ban jaaun
Mand pavan mein banke baadal
Kirnon ke sang behta jaaun

Aur chupke se tujhko choo jaaun
Dhire se dil ki baat bataun
Baat bata kar jo sharmaun
Tere hi aanchal mein chup jaaun

Aur kho jaaun. Bas un hi so jaaun.

Char Sathi

Anderi si ek dagar par
khade the ham char saathi
Mein ban gaya diya
mera mitr diye ki baati
Ek tail ban sama gaya
chautha bana jyoti
Aur is tareh roshan to
ho gayee dagar woh
Par ab safar karne ko
Na bacha tha koi saathi

Tallu

(This was written for our friend Deepak Talesra on occasion of his 40th b’day)
Ek tha ladka bhola bhala naam tha uska Tallu
Man to uska ujjwal tha par tan se tha woh kallu
Roj woh puja karta tha or roj woh karta yoga
Khud hi socho is ladke ka aage haal kya hoga
Yauvan ke chand barson mein jab ritu savan ki aayee
Mitr varg ne ladki chedi isne kari padhai
Mehnat karne se ghabrana isko na tha aata
Tan man dhan se jo shram karta fal meetha hi pata
Apni himmat or mehanat ka shrey isne bhi paya
IIT Entrance mein banda achchi rank le aaya
Bandh ke bori bistar pustak Tallu pahoncha college
Rang birangi duniya dilli, iska aim tha knowledge
Odh ke gila kapda sar par Tallu ne dhuni ramayi
Par computer vigyan ki vani iski samajh na aayi
Kreeda kram ka pahar hua to khela Tallu tennis
Man bhaya ye khel to usko, thi is game mein service
Gurukul aashram khatam hua gatbandhan ka samay aaya
Kripyalu ishwar ne Deepak Jyoti ka pair banaya
Pehli pehli raat dono ne paavan preet ko paya
Jyoti ka sar uncha tha Deepak simta sharmaya
US firm mein job mila to india se li vidayi
Aa pahoncha Edison nagri ek duniya pyari basai
Khil uttha yeh ghar angna, baji khushiyon ki shehnai
Deepak Jyoti jeevan mein Deepti or Divya aayi
Kehat “daddu” kaviray ki pyara dist ye mera
Chalis ka hua aaj, jeevan ka sanjh savera
Is jeevan mein aage bhi tu har sukh paye
Prem pratishtha pyare deepak teri badhti jaye.

chanchal nayno mein …

chanchal nayno mein madira,
hoton pe jhalakta jaam

Tere pyar ka pyasa gori,
tujhko kare salaam.

Tujhko kare salaam
kahe woh aaj pila de,

Dil ko choole aaj wahi
tu geet suna de.

Sunta jaoon, peeta jaoon,
aaj na mujh ko hosh rahe,
aankho se mein kehta sab kuch,
honth mere khamosh rahe.

Honth mere khamosh rahe
na mein kuch bola,
Madhosh hua
fir bhi is dil ka raaz na khola.

Bhool chuka hun aaj mein sab Kuch yaad dila de,
Dil ko choo le aaj wahi tu geet suna de.

Sagar mein uthti lehren,
sahil se mil jatin.
Mere Dil ki har dhadkan,
geet tere hi gati.

Geet tere hi gati hai sargam ka mela,
is mele mein ek mera sangeet akela.

Mere shabdon ko hoton pe aaj sajade
Dil ko chu le aaj wahi tu geet suna de.

Teri Yaad

Sunepan mein chali aayee phir teri yaad
muskuraya hai ye man aaj muddaton ke baad
Koi shaam guzar rahi thi .. aahista aahista
jald aa jaye na kahin phir judaie ki woh raat
Dekhta hun mein khudi ko aaina ban kar
waqt aaya hai mere paas liye koi fariyaad
Nazar ke saamne ho tum – na ho, to bhi to ho
gili palkon pe simat aate dil ke jazbaat
Bujhte deepak pe gila aaj na koi karna
hai andhere ki tamanna itna jal ja ne ke baad.